с. Усть-Кулом

Паметь лун

 Великӧй Отечественнӧй война вылӧ районысь вӧлi мобилизуйтӧма 6562 мортӧс. Бергӧдчисны коймӧд пайсьыс муртса унджыкыс. Уна мамлысь, гӧтырлысь да нывлысь нюкыртic ыджыд дойӧн сьӧлӧмсӧ матыссаяслӧн пӧгибнитӧмыс. Кулӧмдiнын ӧнi ловъя дӧваыс коли 28 морт. Со найӧс и чукӧртлicны война заводитчан лунӧ пукыштны чай-чашка сайын, казьтыштны верӧсъяссӧ, война кадся сьӧкыд вояссӧ.

Тайӧ нывбабаясыс, кодъяс коркӧ кольлicны верӧстӧг том пӧраӧ, кыдз шуласны, морт нэмлӧн дзоридзалан кадӧ, збыльысь тӧдлicны дӧвалысь курыд олӧм. Гашкӧ, тайӧ медсясӧ и кусыньтic найӧс. Ковмывлic ӧд уджавны тшӧтш фронт вылын воюйтысьяс пыдди, вӧчны и мужичӧйяслысь удж. А пельпомъяс выланыc содтӧд коли ас овмӧс, керка-карта, му-видз, семья. Ставсӧ венicны победаӧ эскӧмӧн, верӧсъяссӧ виччысьӧмӧн.

Уна во коли тайӧ кадсяньыс, уна ва визувтic, а вежӧрсьыныс эз на вушйыны война кадся серпасъясыс: фронт вылӧ верӧсъясӧс колльӧдӧм, бӧръя кутчысьлӧмъяс, а сэсся – тӧждлунъяс да удж… Став вынсӧ сетлicны, медым тшӧтш отсавны матыстны победа. Мария Александровна Турьева война чӧж уджалӧма трактор вылын. Ӧнi сьӧкыд вежӧртны, кыдзи тайӧ неыджыд туша-мыгӧра нывбабаыслӧн тырмывлӧма выныc веськӧдлыны кӧрт вӧлӧн, тулыс-ар, тӧв и гожӧм водз асывсянь сёр рытӧдз муркӧдчыны-уджавны колхозлӧн му-видз вылын. А Фёкла Афанасьевна Попвасева тайӧ воясас вӧлi «Выль ног» колхозса председательӧн. Сиктсаяссӧ ышӧдлic эз сӧмын зiль удж вылӧ, но тшӧтш фронтлы отсавны шоныд кӧм-пасьӧн, заёмӧн, сьӧмӧн, кыӧм носки-кепысьӧн. Оз вун Фёкла Афанасьевналӧн ни сэкся колхозникъяслӧн сiйӧ кадся татшӧм телеграмма: «…Висьталӧй месянь пӧсь чолӧм да Гӧрд Армиясянь аттьӧалӧм «Выль ног» колхозса колхозникъяслы да колхозницаяслы, кодъяс чукӧртicны «Усть-Куломский колхозник» танк стрӧитӧм вылӧ 44 сюрс шайт сьӧмӧн да 12 сюрс шайт Государственнӧй заёмлӧн облигацияясӧн.

И.В. СТАЛИН».

Кор заводитчис война, Надежда Васильевна Ульнырова семьянас буретш вӧлi Помӧсдiнын, кытчӧ мӧдӧдлicны уджавны верӧссӧ. А фронт вылӧ ciйӧc колльӧдic мобилизуйтӧмаяслӧн первой пароходӧн. Волic душ-мӧд письмӧ Эстониясянь. Августын, вочакыв пыдди, вайисны бӧр ассьыс письмӧсӧ. Верӧc пӧгибнитӧм йылысь медводдза юӧрӧн пӧ ciйӧ лои, — казьтывлӧ дӧва. «Похоронка» воис бӧрынджык. Нэмсӧ ӧтнас и коллялic. 17 во синтӧм мамсӧ на тшӧтш видзис-дӧзьӧритic. А уджалic кык пыдди (тадз сиктсаяс шулicны. — Н.Б.): порсь видзысьӧ пуктывлicны, 22 во вӧлi мӧсъяс дорын.

Сыкӧд орччӧн пызан сайын пукалысь Павла Павловна Паршукова верӧссӧ, Александр Ивановичӧс, бӧръяысь аддзывлӧма 1941 вося июнь 26 лунӧ фронт вылӧ колльӧдiгӧн жӧ. Коми морт воюйтӧма Ленинградскӧй фронт вылын да погибнитӧма 1943 воын. А Василий Александрович Липин, Мария Александровналӧн верӧсыс, вуджӧма война туй заводитчӧмсяньыс помӧдзыс да усьӧма 1945 вося май 4 лунӧ Берлинын. Лёк юӧрыс воӧма сӧмын май помын. Победа лунӧ энькаыскӧд казьтывлӧмаӧсь на, вот-вот пӧ, гашкӧ, Васьным пырас. Кысь нин бара: война вылад тай смертьыд быд здук орччӧн. Со и коми зонмӧс сiйӧ бырӧдic дыр виччысяна лун водзын.

— Менам Ӧльӧксан Миш ок ёна гудӧкӧн вopcлic, бура йӧзтӧ гажӧдлic. Письмӧын весиг гижлiс, гаж пӧ гудӧкысь бырис. Мися, локтан да пӧттӧдзыд ворсан, а ме сьывны-йӧктыны кута. Ленинград дорса кутшӧмкӧ нюр дорын и усьӧма, коньӧрӧй. Сьылӧдӧм-гажӧдӧм пыдди синва кымын пычкис, — висьталic Павла Дмитриевна Кочанова, кодi дӧваӧн кольлӧма 25 арӧcӧн, ки вылас 3 арӧса кагаӧн. И водзӧ казьтылic:

— Война заводитчытӧдз на семьянымӧс рӧкыс суис: 1940 вося арын керканым сотчис став овмӧcӧн, кӧлуйӧн и эмбурӧн…

Мария Александровна Касева верӧскӧд олӧмсӧ тӧдлӧма cӧмын 5 тӧлысь. Первой колльӧдӧма армияӧ, сэсся суӧма финскӧй война, сы бӧрын и мӧд война. Туй вывсяньыс открытка вылын юӧр ыстӧма: муна пӧ рота примитны. Со и став казьтыланторйыс, мый колис Семён Иванович гӧтырыслы. Весиг «похоронка» эз волы. Сӧмын гижлicны, вошӧма пӧ, вермас лоны, ловъя на кӧнкӧ. Уна во мысти пионер-следопытъяс тыш местаясысь корсьысигӧн аддзӧмаӧсь Семён Иванович Касевлысь шойсӧ. Гӧтыр ним вылӧ письмӧкӧд тшӧтш мӧдӧдӧмаӧсь сылысь медальсӧ.

Сьӧкыд олӧм-уджыс Анастасия Алексеевна Казариноваӧс кусыньтӧма жӧ нин. Ачыс шмонитӧмӧн шуӧ: пызь мешӧкӧн пӧ ачымӧс мегыртi. Сiдз ли тадз, а 17 во чӧж нянь пӧжалiгӧн ас вылас гырысь мешӧкъястӧ новлӧдлыны вель ёна сюрлic. Война кадӧ нин тайӧ удж вылас вӧлi, весиг фронт вылӧ сукар тыра посылкаяс мӧдӧдлicны, А пӧжавлicны да косьтывлicны мӧд смена вылӧ кольччӧмӧн.

— Война вылӧ мунлicны верӧc семьяысь куим вок. Куимнанныс — нэм кежлӧ. Верӧсӧй усис мӧд вонас Ленинград дорын. Первойсяньыс разведчикӧн вӧлi. Разведкаысь локтiгӧн жӧ и пӧгибнитiс, — висьталic Ана­стасия Алексеевна.

Дӧваяс дыр пукалicны да казьтылicны том пӧрасӧ. Ӧттшӧтш кылic тӧжд ӧнiя сьӧкыд олӧмысь. Важмисны нин оланiнъяс, оз вичмы бокисянь отсӧг и видз-му вӧдитӧмын. Унаӧн элясисны пес кузя. Неыджыд пенсия ӧдва тырмӧ сёйны-юны, а любӧй удж вӧчӧдӧмысь лоӧ мыччыны дона вина доз. Вера Ивановна Булышевалысь (40 сайӧ во уджалӧма связьын, унджыксӧ — телефонисткаӧн — Н.Б.) ӧшинювсӧ кодйисны-жугӧдiсны стрӧитчӧм могысь. Стрӧйбаыс эз и кыпты, а мортыслысь нэм чӧжӧн вӧчӧм град йӧр бырӧдicны. Со на кутшӧм «тӧжд» петкӧдчывлӧ дӧваяс вӧcна.

Районса администрацияӧн веськӧдлысьяс С.П. Каплин да Г.И. Холопова, райвоенком Н.Л. Белошаньгин, сиктсӧветса председатель Н.И. Исаков, ветеранъяслӧн сӧветса председатель И.Г. Семяшкин кӧсйысисны отсыштны кокньӧдны дӧваяслысь олӧм. Ышӧдicны, мый кодcюрӧлы выль патера вичмас: юрсиктын мӧвпалӧны стрӧитны 28 патера вылӧ ветеранъяслы керка (2 млн. шайт та вылӧ торйӧдӧма нин. — Н.Б.). А рытсӧ казьтылӧм вылӧ ставныслы сетicны козинъяс.

Дӧваяс разӧдчисны водзӧ олӧм бурмыштӧм вылӧ эскӧмӧн. Мед лоӧ тадз.

Н. БУТКИНА.

 

 © Усть-Куломская межпоселенческая библиотека